Derbyn i Ysgolion - Cwestiynau Cyffredin

Beth yw polisi derbyn i ysgolion y Cyngor?

Cewch fanylion Polisi Derbyn i Ysgolion Torfaen 2025/2026 yma.

Ni allwn warantu y bydd eich plentyn yn cael lle mewn ysgol benodol, hyd yn oed os mai’r ysgol honno yw ysgol y dalgylch. Argymhellir eich bod yn dewis o leiaf tair ysgol i gynyddu eich siawns o sicrhau lle mewn ysgol yr ydych yn hapus â hi.

Rhoddir lleoedd mewn ysgolion trwy ddilyn y meini prawf a gyhoeddwyd ar gyfer achosion lle mae gormod o bobl eisiau lle yn yr un ysgol, ac wrth roi gwybod i chi am ein penderfyniadau byddwn yn dilyn y polisi derbyn i ysgolion.

Pa gyfeiriad ydw i'n ei ddefnyddio?

Mae’r cyngor yn ystyried cyfeiriad cartref eich plentyn fel y lle y mae’n byw'n barhaol ar gyfer mwyafrif yr wythnos ysgol ar y dyddiad cau perthnasol.

Os yw'ch plentyn yn byw mewn cyfeiriad gwahanol yn ystod yr wythnos neu os yw'r plentyn yn treulio yr un faint o amser gyda'r ddau riant mewn cyfeiriadau ar wahân, neu os oes anghydfod ynghylch cyfeiriad y cartref, ystyrir cartref y sawl sy'n cael Budd-dal Plant fel cartref y plentyn.

Os byddwch yn symud i dŷ arall yn ystod y broses ymgeisio, eich cyfrifoldeb chi yw rhoi gwybod i ni am unrhyw newidiadau mewn amgylchiadau - gan gynnwys newid cyfeiriad - ar ôl cyflwyno'ch cais.

Bydd hyn yn sicrhau bod unrhyw ohebiaeth yn cael ei hanfon at y cyfeiriad cywir yn unig, a ni fydd yn effeithio ar ganlyniad eich cais os yw hyn ar ôl y dyddiad cau.

Bydd cyfeiriad newydd ond yn cael ei ystyried wrth bennu canlyniad eich cais os ydych yn byw yno ar y dyddiad cau, ac yn cyflwyno tystiolaeth o hyn.

Os ydych yn symud i mewn i Torfaen neu i rywle arall yng Nhorfaen, ni ddylech gymryd yn ganiataol y bydd eich plentyn yn derbyn lle yn yr ysgol leol.

A all fy mhlentyn ddechrau flwyddyn yn ddiweddarach, neu yn y flwyddyn o dano?

Rydym yn disgwyl i blant gael eu haddysg yn eu grŵp blwyddyn, oni bai bod amgylchiadau arbennig, megis plant ag anghenion dysgu ychwanegol neu blant sydd wedi cael problemau neu wedi methu rhan o’r flwyddyn, yn aml yn sgil salwch.

Pan fo amgylchiadau eithriadol, byddwn yn ystyried cais rhiant i blentyn gael ei dderbyn y tu allan i’r grŵp blwyddyn arferol.

Fodd bynnag, does dim hawl i apelio os yw lle’n cael ei gynnig ond nid yn y grŵp blwyddyn dewisol.

Ni fydd eich plentyn yn cael ei dderbyn i unrhyw grwp blwyddyn y tu allan i'w oedran cronolegol oherwydd bod y grwp blwyddyn cywir yn llawn. 

A allaf i roi addysg i’m plentyn gartref?

Mae gan rieni hawl i addysgu eu plant gartref os ydynt yn bodloni gofynion adran 7 Deddf Addysg 1996.

Mae hyn yn rhoi dyletswydd ar rieni bob plentyn o oed ysgol gorfodol i sicrhau bod y plentyn yn derbyn addysg llawn-amser effeithlon sy'n addas i'w hoedran, gallu a sgiliau, ac i unrhyw anghenion addysgol arbennig all fod ganddynt, un ai drwy fynychu ysgol yn rheolaidd neu fel arall.

Os yw eich plentyn yn mynychu'r ysgol ar hyn o bryd a'ch bod yn penderfynu addysgu’r plentyn yn y cartref, dylech ysgrifennu at yr ysgol yn gofyn iddynt dynnu enw’r plentyn oddi ar gofrestr yr ysgol a datgan eich bod yn deall mai eich dyletswydd gyfreithiol chi yw sicrhau eich bod yn darparu addysg sy’n addas.

Sylwch na fydd rhieni’n derbyn unrhyw adnoddau na chanllawiau ar addysgu na’r cwricwlwm gan y cyngor unwaith y gwneir penderfyniad i dynnu’r plentyn o’r ysgol.  

Gallwch gael rhagor o wybodaeth am addysg ddewisol yn y cartref yn Nhorfaen yma.