Rheoli'r Perygl o Lifogydd

Mae disgwyl i lifogydd gynyddu yn y DU wrth i newid yn yr hinsawdd ddod â thywydd cynhesach, gwlypach. 

Mae sawl sefydliad yn ymwneud â rheoli’r perygl o lifogydd yng Nghymru. 

Fel prif awdurdodau llifogydd, rhaid i gynghorau ddatblygu Strategaeth Perygl Llifogydd Lleol a gweithio gyda phartneriaid, gan gynnwys Llywodraeth Cymru, Asiantaeth yr Amgylchedd a Chyfoeth Naturiol Cymru.  

Rhaid i brif awdurdodau llifogydd hefyd: 

• Gadw cofrestr o asedau a allai arwain at lifogydd
• Ymchwilio i ddigwyddiadau llifogydd
• Hyrwyddo datblygu cynaliadwy
• Rheoleiddio gwaith ger cyrsiau dŵr cyffredin

Y darlun cenedlaethol

Mae Deddf Rheoli Llifogydd a Dŵr Llywodraeth y DU yn amlinellu strategaeth genedlaethol ar gyfer rheoli’r perygl o lifogydd ac erydu arfordirol. 

Mae'n amlinellu rolau gwahanol awdurdodau, gan gynnwys cynghorau lleol, ochr yn ochr â Strategaeth Llywodraeth Cymru ar Reoli’r Perygl o Lifogydd ac Erydu Arfordirol.

Mae hefyd yn cynnwys gofyniad i gynghorau lleol oruchwylio Canllawiau Statudol Draenio Cynaliadwy ar gyfer unrhyw ddatblygiadau newydd dros 100 metr sgwâr.  

Strategaeth Perygl Llifogydd Lleol 2024-2030

Mae'r strategaeth yn nodi sut mae cynlluniau'r cyngor yn paratoi ar gyfer peryglon llifogydd lleol sy'n digwydd yn sgil: 

• Dwr sy’n llifo oddi ar yr wyneb
• Dŵr daear
• Cyrsiau dŵr cyffredin ee nentydd, ffosydd, draeniau a chwlferi

Mae'n egluro pa sefydliad sy'n gyfrifol am atal a rheoli llifogydd, pa fesurau sydd angen eu cymryd i leihau'r perygl o lifogydd, sut mae gwaith yn cael ei flaenoriaethu a beth y gall cymunedau ei wneud.  

Mae Cynllun Argyfwng Hinsawdd a Natur y cyngor yn nodi pa gamau lliniaru sydd eu hangen i leihau effaith newid yn yr hinsawdd, fel mwy o lifogydd.