Wedi ei bostio ar Dydd Mawrth 11 Mehefin 2024
Mae sylfaenydd rhaglen ysgol gynradd ryngwladol wedi canmol ysgol leol.
Mae Ysgol Gynradd Gatholig Mair a’r Angylion, yng Nghwmbrân, wedi bod yn addysgu gwersi Roots of Empathy ym Mlynyddoedd 3 a 4 er 2019.
Mae'r fenter yn helpu disgyblion i ddysgu am emosiynau ac empathi drwy adael iddynt ddilyn datblygiad baban, rhwng pedair ac 11 mis oed. Mae'n caniatáu iddynt dreulio amser gyda'r babi yn eu hystafell ddosbarth a gofyn cwestiynau i'r rhiant.
Yn gynharach eleni, teithiodd y sylfaenydd a'r entrepreneur cymdeithasol Mary Gordon o Ganada i ymweld â'r ysgol i ddarganfod sut roedd y rhaglen yn helpu plant.
Meddai: "Mae hon yn ysgol arbennig iawn ac mae'r plant mor garedig â'i gilydd. Nid oes unrhyw blentyn yn cael ei adael allan ac maen nhw i gyd yn gweithio ac yn chwarae gyda'i gilydd yn hyfryd. Fe ddylech chi fod yn falch iawn."
Dywedodd y Pennaeth Ceri Prosser: "Trwy Roots of Empathy mae ein plant yn dysgu ein bod ni i gyd wedi cael ein gwneud yn yr un ffordd ond ein bod ni’n wahanol a bod angen dathlu hynny.
"Maen nhw'n ehangu ar eu gwybodaeth a'u dealltwriaeth o emosiynau gwahanol a sut mae pobl yn profi'r rhain yn wahanol. Mae'r rhaglen hefyd yn rhoi'r eirfa iddynt i fynegi eu hunain a'u teimladau mewn ffordd briodol.
"Mae llawer o'r babanod yn mynd ymlaen i fod yn ddisgyblion yn ein hysgol ni ac mae hynny’n arbennig iawn gan fod y plant hŷn yn aml yn eu hadnabod."
Mae'r rhaglen wedi bod mor llwyddiannus, ac mae'r ysgol nawr yn bwriadu lansio Seeds of Empathy i ddisgyblion iau ym mis Medi.
Meddai Toby, disgybl ym Mlwyddyn 3: "Mae'n ein dysgu sut i feddwl am sut oedden ni pan oedden ni'n ifanc a sut i fod yn garedig wrth ein gilydd. Mae'n gwneud i ni ymlacio pan fydd Miss yn darllen y stori i ni. Rydyn ni wedi dysgu edrych ar wynebau pobl i wybod sut y gallen nhw fod yn teimlo."
Meddai Harriet: "Dwi'n mwynhau'r wers oherwydd mae gwylio'r babi yn tyfu mor ddiddorol. Rydyn ni wedi dysgu am gerrig milltir ac rydyn ni i gyd yn gweithio'n galed i'w cyrraedd. Mae help a chefnogaeth yn bwysig er mwyn cyrraedd cerrig milltir."
Ychwanegodd Eden: "Rydyn ni wedi dysgu sut mae babanod yn datblygu a phethau sy'n ddiogel ac yn anniogel i blant. Rydyn ni wedi dysgu bod caredigrwydd yn bwysig a bod cariad yn tyfu ein calonnau a'n meddyliau."
Mae Roots of Empathy yn un ffordd sydd gan yr ysgol i ddarparu profiad dysgu amrywiol i sicrhau bod disgyblion yn mwynhau mynychu'r ysgol.
Ewch i'n gwefan am wybodaeth am bolisi presenoldeb yn yr ysgol #DdimMewnColliMas y Cyngor.